Ikastola Eguna 2023 - Eskerrik asko! [Irudi Galeria Ikusgai]
Berriak
ESKER ONEKOAK GARA!
Eguraldiak lagunduta, ekin diogu 2023ko Ikastola eguna festari eta merezi genuen bezala ospatu ahal izan dugu. Beste behin, egun borobila ospatzeko aukera izan dugu. Orain eskerrak ematea dagokigu!
Eskerrak gure ikasle guztiei egun honetan ere erantzuten jakin duzuelako. Protagonistak zuek zarete eta zuekin eta zuentzat ari gara.
Eskerrak baita ere Legazpiko Erraldoi Konpartsari gure festa eguna alaitzeagatik!
Eskerrak ikastolako familia guztiei. Ikasturte luze honetan egindako elkarlanaren emaitza da egun hau eta batetik eta bestetik denok lagundu duzue.
Eskerrak txoko solidariorako materiala (bizkotxoak, bitxiak…) ekarri duzuen guztioi. Gu baino okerrago daudenak ere gogoan izan behar ditugu: elkartasuna da gure ezaugarrietako bat.
Eskerrak udalari materiala uzteagatik! Eskerrak mahaiak eta aulkiak jarri eta kentzen aritu zareten guztioi. Jartzea gutxi ez eta dena bukatutakoan azken ahalegina ere egin duzuelako.
Eskerrak elkarrekin afaltzen elkartu garen guztioi. Giro ezin hobea sortu dugu denok batera. Urrunetik entzungo ziren gure kantu eta algarak.
Eskerrak bertaratu zareten guztioi. Eta bertaratu ezinik geratu zaretenoi ere bai. Pozgarria izan da, auzolanean eta festa giroan elkartzea.
Datorren urtera arte, ESKERRIK ASKO!
